il primo blog in dialetto trentino

Sem drio a eleziom... ancora

2008-03-16T12:55:00.004+01:00

Forse, ma forse forse... no ve se acorti che fra'm po' toca nar a votar ancora.
Eh si, ancora na volta dentro per quei gabioti fati su coi resti dele casse de pomi dela Val de Non e Moquette (me dispias dropar sta parola, ma no trovevo l'equivalente trentim), co le matitine co la ponta fata mal, co la luce sora la testa che la te brusa i cavei se te sei pù alt del metro e vinti. Te vè dentro, i te domanda carte, licenze, certificati e po' i te varda strof, ma veramente strof, come per dir: "Vara sto mona, se capis subit che'l farà na monada, eh ma cossa vot farghe, l'è colpa de quei come lù se dopo l'italia la va en malora". Alora te provi a vardar tuti quei zercoloti con dentro bandiere, nomi, stemmi, falz, scudi, luganeghe. No, luganeghe no: quele no le gh'è mai. Ma se ghe fussa en bel partito dela luganega mi el voteria subit. Ve'l emaginè? VOTA ANCA TI EL PARTITO DELA LUGANEGA: PER EN MONDO NOF, CON PU' LUGANEGA PER TUTI, E VE PROMETO CHE SE VINZEREM GHE SARA' ANCA POLENTA (OVAZIONE).
Che bel che'l saria... enveze...
A "Porta a porta" i g'ha zà pronti el plastico dele promesse elettorali dela sinistra, del centro, dela destra, del centro-sinistra, del centro-destra, del centro-centro-destra, del centro-centro-sinistra, e de tanti altri che no se sa bem 'n'do' i vol star.
(No i aveva dit che saria stà na roba pù de bipolarismo? Mah, me sarò pers qualcoss).
Veltroni l'è partì col pullman en giro per l'Italia, me par zà de vederlo: sentà en font, come i fighi dele medie, a cantar canzom come i puteloti en gita.
Berlusconi enveze el va ai palazeti del sport a far coriandoli.
Ades scuseme se no nomino anca tuti i altri ma no finiresem gnanca nel giro de do/tre ani...
Ensoma avè capì come che sem messi... Quindi quando entrerè nel gabiot penseghe su bem, e se proprio na gavè idee, pensè ala polenta e ala luganega, che le ve dia l'ispiraziom giusta!

El carneval (che'l vei dopo el Nadal...)

2008-01-22T17:06:00.000+01:00

Anca se no som tant sicur.
El carneval l'è na bela festa, ma no me pias na roba, no te sai mai quando che la vèi: Feragosto l'è semper al quindese, Nadal al vintizinque. El carneval no! Ensema ala Pasqua i è i paroni del calendario: i fa quel che i vol lori: a colpi i vei prest, che l'è ancor fret (come st'an chi), e a colpi tardi che l'è zà primavera.
Che tra l'altro per mi l'è na roba de marketing:
Per dir, st'an chi voi vestirme da Jurka, alora vago en Südtirol (che i è specializadi) e me crompo na vagonada de pelicia da trarme adoss per nar en giro e spaciarme per la morosa del'orso Knut.
L'am dopo no la va pù bem! Perchè sicuro che el carneval el sarà minimo minimo ala fim de marzo, che l'è difizzile dirè, ma quei del marketing i pòl tut, anca far vegnir Pasqua de sabo.
E alora ghò da nar, e vestirme su da Bagnino del lac de Garda (no, non de quei che porteva via le bici) perchè si no, moro dal calt!
Comunque tornando al carneval, voria consigliarve en po' de costumi che magari no gavè idee:

Da Sonador de la banda de paes, costume comodo, con quele bele giachetine dai colori pù embriaghi che gh'è. L'è en costume poco costoso: gh'è sempre qualche parente o amico che sona el triangolo o el cembalo nela banda del paes, o ancor mejo te sei proprio ti el sonador. Se la giachetina l'è de color vinazza l'è mejo.
Da Don Sante che per capirne l'è la versiom taliana de quel prete de Storo che durante la predica el conteva de no eser na en giro con de na putela. Per come vestirse lasso far a voi l'importante l'è scriver en libro e nar a Porta a Porta.
Da Governo che cade, che po' no l'è vera che el casca, disem pur che l'è en bilico, toh, come la Tor de Pisa, quindi meteve la maschera de Prodi e caminè tuti storti en costa. Se volè vestir su qualche amico da senatore zentenario che ve mete i paleti e i picheti per no farve nar en tera del tut, l'è pù folkloristico.
Da Bepe Grilo, sempre per eser atuali, vestive su de nero, nè en giro col tandem euro 23 e mandè a quel paes tuti, ma proprio tuti tuti quei che ve varda. E sopratutto fè en po' i zigaloni.
Da Saldo, l'è el costume pù dificile, perchè, per eser bel el gha da costar gnènt, tant da farte dir dopo che te l'è crompà: "ho sparmià!", ensoma... bisogna crederghe...

Bom, la lista per adès la saria finida...
Apena che scopro el dì giusto del Carneval vel fago saver, e per piazer no vestì su i vosi popi come i teletubbies, che dopo i ciapa bruti vizi e no ve la cavè pù!

L'è Nadal!

2007-12-23T11:02:00.000+01:00

Eh si, ormai l'è proprio Nadal, anca se per la televisiom sem drio a eser vizzini a Nadal da almem do/tre mesi. Difatti come che è finì el periodo dei Morti, che però quei pù fighi i ghe ciameva Alouìn (che a mi me par sempre el nome de n'anti dolorifico) per televisiom s'è scominzià a veder tuti quei che te dis: "Vara vara che l'è quasi ora de far l'alber!" osti, som apena tornà dal zimitero, ma no se speteva l'oto dicembre na volta?, "Oh, crompa el zampone che se no el finiss tut e a capodanno te toca magnar riso pescà su dal'aqua", po' te vedi el Buffon vestì su come en paiazzo che el va a comprar zugatoi, po' ghè quel'altro che se a Nadal no'l ghà da venderte el materass losangà e minimo quarantoto padele (en lana merinos anca quele) coordinate co la cravata del cenone , no l'è content. MI NO SO!
A parte el fato che i scominzia sempre prima (basta vardar la publicità dei zaini e dele cartele dei scolari: quando che ero picol mi, i scominzieva co la cartela del topo Gigio a fine agosto, che te tornevi dal mare o dal lac, e te disevi: "La cartela, che me'n faga de la cartela che som en vacanza?" E dopo te te scorzevi che l'era zà setembre, e no t'avevi combinà gnent en tuta l'istà e alora su de corsa a far i compiti dele vacanze. Però da giugno a Agosto te vivevi tranquilo, col cul ent'e l' aqua e co la sabia nel costume. Adès la scola la finiss al dese, e al dodese i è zà lì che i te dis de crompar el diario dei mostri, de l'uomo ragno, del magna luganeghe...
I se stresa prima del temp).
Orco che parentesi longa, ma tornem a bomba:
I scominzia sempre prima e 'i insiste el dopio!
Quindi con questo cosa volevo dir? A si che fasendo do conti veloci veloci i rote le bale almem sei/sete volte de pù del dovuto...
e quindi:
BONE FESTE!!!

Cane dall'uva

2007-12-09T10:00:00.000+01:00

Mi no so. Ormai ghè zent che no parla pù el dialet, ma i dovria perchè se no i parla el dialet, no vol miga dir che i sapia el taliam. Adess ve spiego come riconoserli, sti finti "'talianèi":

I è facili a dropar tante preposizioni: "levar su da per terra", "far giù da mangiare", "lavar giù i piatti", "andar su da giù lì" e tante altre che avè sicuramente sentù.
Se pol sentirli pronunciar frasi del tipo: "Varda, sono al ristorante e sono dietro a conciare la salata, ma cane dall'uva non stare a disturbarmi! Ti richiamo quando arrivo a gettare il mosegotto!"
Al bar, quando 'i è drio a far l'aperitivo i gradiria "due gallette" da magnarghe ensema, no, no i vol en polastro, i vol le nocioline 'mericane.
E quasi semper i gha la moglie 'taliana, almem almem de Milam, e sicome a Milam no è resta pù nesuni che parla el dialet, anca lù (el pindol de turno) el se adegua.

Ma cossa vot adeguarte che quando che i te sente parlar tutti i te ride drio per ore?
Te sei en pericolo publico: l'altro di al bar gh'era uno, che l'ha saludà tuti prima de arivar al bancom e el treva en giro dei "Buon pomeriggio come va? Tutto ben Oggi? Ah ma come diamine fai a tenerti sempre così in forma? Ah si? Usi la folacina?", ma l'era indeciso su cosa tor da bever, alla fim l'ha scelto en cafè e el g'ha dit: "Ma si! Prendo un caffè e sciao". Mi ero drio a sofocarme con de na patatina, che la sì'era empiantada zò 'ntela gola!

Pò ghe saria n'altra categoria de sta zènt chi, che podressem definir, n'voluziom dela specie, cioè quei co' sto difet chi, che enveze che star a far le figure de merda nei so' paesi, i va a farle en tele.
I và lì tuti eleganti coi cravatoni longhi fim ale mudande, e i parla de politica, de sport, e sopratuto de calcio! Ma questi i meriteria n'enciclopedia sol per lori, per tute le monade che i conta!

Va bom, ades ve saludo che "vado fuori sul ponticello a prendere un po' di aria"

el Paolo Brosio a Trent

2007-12-01T13:40:00.000+01:00

En po' de dì fa ho let su l'Adige che vegniva a Trent el Paolo Brosio, che l'è sto chi per chi no'l savesse:

(mentre el fa autostop; metre el domanda la grazia a Sant' Antonio e mentre el's' empiola a vardar superquark)

"Ma cossa el vegnù a far???" me som domandà, da bom trentim.
L'Adige el gaveva la risposta pronta per i me dubi: l'è chi per le olimpiadi del cuore (roba de beneficenza insomma, no l'è vegnù a roter le bale, l'è vegnù per far bele robe che aiuta la zent).
Per presentar quel che l'g'aveva en testa (en senso metaforico, dato che l'è pelà) l'ha fat en zenom de quei fighi coi VIPS dela televisiom (mancheva sol el Gabibo e Gioslen, quel del gioco de l'oca e po' i gh'era tuti) dal Dorigoni, no, no l'è en ristorante nuovo, l'è proprio el Dorigoni, quel da le machine, i ha davert tuti i sporteloni dei baui e i ha magnà su le targhe; è na tut bem e tuti i è restai contnenti (tranne en po' el sior Dorigoni, che 'l s'è acort che qualcheduni l'ha dropà i tergicristali del Cayenne per curarse i denti).
Ma come sempre gh'è en però!
Difati al Paolo Brosio qualche dì prima i g'ha ciavà la machina (en bel machinom de quei longhi e alti da sioroni). Ma come? En Trentino? A Trent? Ma no ghè criminalità! Trane en qualche zona, vabem, ma i lo sa tuti, e se no te sei mona te stè atent!
Endovina chi no saveva che Piaza Dante a Trent no l'è en bel posto per parchegiar?
Bravi! El Paolo Brosio no'l lo saveva! Paolo, se t'avessi almem vardà en filmato del Super Mario...

LE - MONADE

2007-12-01T13:27:00.001+01:00

Alora ades ve spiego cossa che voj far e perchè:

Se no te ghai el blog no te sei nesuni, tant che de sti tempi prima de domandarte el codice fiscale i te domanda prima se te ghè el blog;
Ghò tant temp da perder, o mejo, nol g'averia, ma'l trovo sempre;
Voj provar a scriver en dialet e magari fra qualche an el meto sul curiculum tra le lingue parlade, sicome per entant ghò su scrit sol: "italiano madre lingua, e dialetto trentino livello di conoscenza scolastico";
Boh, se me vej en ment altro vel fago saver.

El titolo del blog l'è: LE MONADE, atenziom che ghè el spazio, quindi no parlerem de suchi fati col limom e gnanca de robe de lengua de puteloti sula bancheta al parc (o magari si, se me disè n'dove trovarli), parlerò, conterò de MONADE, principalmente del nos bel Trentino (Trentinade), ma anca del'Italia ('Talianade), e del'Europa (Europeade, perchè gnanca a peade se va avanti, questa però l'è del' Andrea Castelli).